..مزااااااااااااااااج
نمت وأنا معصبة ومتضايقة
اش تتوقعون من وحدة مستعسرة؟
فوق هذا، أدش المدونة وألقي د. فيل يقول
هل تعتقدون ان الدكتور عايش سعيد في حياته؟
هل تعتقدون ان أوبرا وينيفري مستانسة بعيشتها؟
--------------------
يا حلات المطر يشرح القلب
أخيرا حسيت بالأجواء الشتوية
--------------------
ودي أسوي أشياء مينونة
بخاطري اطلع من إطار المثالية
ابي أعيش عمري
ابي أمنع عقلي من التفكير
أبي أعيش يومي لي
ابي انفصل عن العالم إلى مكان هادي
أبي اسافر الى جزيرة في شرق آسيا
ابي أضحك من قلب لين عيني تغورق
مليت وأنا ساكتة عن اشياء تضايقني
مليت وأنا اقول الصبر زين
مليت و مل الصبر مني
ابي احس ان الدنيا بخير
ابي احس براحة البال
ان حطيت راسي عالمخدة
اقول ان باجر بيكون أحلى
ابي أحد يفمهني
يفهم اني حيل بسيطة
ابي اروح المدينة الترفيهية
وأركب ألعاب عمري ما ركبتها
ألعاب أخاف منها
لعبة تحذفني
لعبة تقلبني
من فوق الى تحت
أبي اسوي شي مو مألوف
ولا عمري سويته قبل
المهم.. اني أكسر هالروتين
أكسر حواجز انا بإيدي حطيتها
أبي افرفش.. انسى مسؤولياتي
ولو يوم واحد.. مو أكثر
اعرف ان التغيير ما يحتاج جراحة مـــخ
بس اشلون.. ومتى.. مادري
ماحد يساعف
--------------------
فعلا ملقوفة!! تروح وترد إلا بتعرف انا اش قاعدة اكتب!
هل كل السكرتيرات ملاقيف؟؟
--------------------
كفاني تحلطم.. ماني عارفة اركز على شي واحد
هل هذا بسبب الإكتئاب
February 1, 2009 at 12:03 PM
صباح الخير
سلامتج من العصبية
اخذى قهوة فرنسية
وشربيها وانتى تطلين على دريشة
واتشوفين الناس اللى رايحة واللى ياية
جربي المحاولة هذى
وعطينى رايج
تحياتى
February 1, 2009 at 12:13 PM
صباح النور
مكتبي ما فيه دريشة
أفكر إني استوطن المكتب
اللي حولي.. وأجرب كلامك
February 1, 2009 at 4:07 PM
اهاااا
اذا عرف السبب بطل العجب
اهنى المشكلة
يعنى العتمة اللى انتى فيها والعصبية اللى فيج
يعنى مافى مجال للتنفيس على الروح
نصيحة اخوية
اخذى لج فرة بين المكاتب
:)))
تحياتى
February 1, 2009 at 5:09 PM
حااسة فيج :(
شووفي طلعي غيري جووو
استانسي روحي الترفهية
انا قبل فترة حاشني إحباط نفسي
رحت الترفهية
ركبت لعبة خضتني هههههه
فرت نفسيتي فوق تحت
صاارخت من قمة راسي
من الخرعة طبعاً ومن القمتة
حسيت بشعووور عجييييب
وحدا نفسيتي تغيرت
وهممم روحي السوق أشتري أي شي
ترى يساعد هالشي واايد
حتى لو شي سخيف أو ما تحتاجينة
بس خاطرج تشترينة اشترريه
روحي الصبح امبجر على البحر
تمشي وتنفسي من قلب
شهيق وزفير
وشوفي شلون كل شي يتغير للأفضل
الله يحفظج يااارب ويبعد عنج الكآبة والضيقة
:*
February 2, 2009 at 9:19 AM
قانوني
أحسن اقتراح، وبعتمده حق الايام الياية
حياتي هدف مو عبث
كنت مخططة اني اقترح على العايلة نروح الترفيهية الأحد بس الجو ما ساعد وخفت انه إيينا فجأة واحنا هناك، فقلت اخليها يوم الثلاثاء او الاربعاء.
على طاري السوق ياية اقول لج بلاش خساير بس تذكرت اني قاطة مبلغ محترم على حجز سويت في احد الفنادق
ههههههه
حدي فاضية، دام ماكو سفر خل أربـّح ديرتي.. يعني شي يساهم على التغيير
وبكل تأكيد الفاتورة بتندز حق زوجي
حتى لو كانت ففتي ففتي
ههههههه
المزاج اليوم عال العال
February 2, 2009 at 9:22 AM
Anonymous
اشكرك على الدعوة لكن بلاش عوار راس
انا كنت في الوسط الديمقراطي بالجامعة وكانوا اشحلاتهم لكن إن ييت على هالموقع والليبراليين القح انا مو صوبهم ولا تبع تفكيرهم الغريب