Kwt City

مدينة الكويت


قالت: تو الناس على التقاعد، ليش مستعيلة
قلت: حلاته الوحدة تشتري راحة البال
قالت: ان تقاعدتي رح تمليّن وتلوع جبدج من القعدة في البيت
قلت: من قال؟ بيكون عندي جدول! الصبح اتريق مع الوالدة وأتسوق معاها، والظهر أروح لنادي صحي ومن العصر الى الليل اكون مع عيالي أدرسهم وأونسهم
قالت: عيل ما لج في البزنس شي
قلت: ليش أعوّر راسي.. اشتري لي بيت أو عمارة وأجرها ويكون لي مدخول شهري ثابت ومضمون
قالت: من وين يا حظي
قلت: شنو من وين.. احنا ليش نشتغل كل يوم.. ليش ننكرف أكثر من 20 سنة.. عشان نيّمع لنا جم فلس حق هالزمن
قالت: وفلوس التقاعد؟؟؟
قلت: حرامية
قالت: خافي ربّج
قلت: من صجج؟؟ كل من يدري انهم يعطونج أقل ما أتخذ منج
قالت: اييي بس بيعي من معاشج يعطونج جم ألف مثل القرض
قلت: بس ياخذون منج زيادة على المبلغ، يحسبون عليج الفوايد
قالت: بعد؟؟؟؟
قلت: عيل اش حسبالج.. خذ من جيسة وعايدة واشفط منه زود فلوس

قعدنا نفكر.. ونحط خطة للأجيال القادمة.. لنا ولعيالنا
قلت لها.. انا من هالشهر أقدر أخش 300 دينار من معاشي
وإذا زاد بعد خمس سنين.. اخليه 350 أو 400 دينار
خدمتي شكلها بتكون 20 أو 25 سنة.. قولي عشرين سنة على الأقل

300 * 12 = 3600 .. في خمس سنين = 18000 الدرجة الوظيفية الثالثة
350 * 12 = 4200 .. في خمس سنين = 21000 الدرجة الوظيفية الثانية
400 * 12 = 4800 .. في خمس سنين = 24000 الدرجة الوظيفية الأولى

خطة توفير الـ 15 سنة .. حصيلتها 63000 دينار
+ إضافة أي مبلغ يدش من البزنس الحالي
+ إضافة أي مبلغ زايد عن الحاجة
+ إضافة أي مبلغ زيادة عالمعاش
وأظن ان الواحد تكفيه700 دينار يعيش فيها كل شهر
:)

الفكرة منطقية.. فيها شدة حزام.. والتخلي عن بعض الكماليات


هل جربتوا تسوون خطة توفير شخصية؟

6 comments

  1. حياتي هدف مو عبث  

    حالياً أنا ما أشتغل
    لكن مصروفي الشخصي من أمي
    أشيل مبلغ منه
    وعندي مبلغ على قدي
    والحمدلله للحين ما جستهم
    بعض المرات أقوله ليش أخشهم خل أصرفهم
    بس أحس بالأمان لي دريت عندي مبلغ محد يدري عنه

    ابدي بالتوفير لأن أكثر اللي نصرفه على أشياء قد لا نحتاجها فعلاً



    :*

  2. @alhaidar  

    والله الخطة حلوة ..

    بس التطبيق صعب ..

    طريقك مسدود يا ولدي :))

  3. مركبنا  

    4 سنوات من الخدمة

    وعلى اخر الشهر ياحيل الله

    عموما من حولي رايت اناس استطاعوا

    اذكر وحدة من بنات العايلة
    اول ماتوظفت امسكت عمرها حيييييل

    وانا ابربس بالفلوس توظفنا مع بعض

    بعد فتره شريت سيارة وسط واقساط وايد
    واهيا طقت لها لكززس والقسط صار بالقاع بسبب الدفعه الاولى القوية

    وبعدها عاشت بنعيم
    الله يهنيها

    فما في شئ صعب اذا الواحد حاول

  4. إمـرأة لا تُنسـى  

    حياتي هدف
    كنت أقول لنفسي نفس كلامج، والحين غير صرت أفكر بـ مستقبل عيالي اشلون بيكون إذا في زمننا صارت العشر دنانير جنها دينار، اشبيكون وضعهم الاقتصادي؟

  5. إمـرأة لا تُنسـى  

    الزميل أحمد

    ماكو شي اسمه مستحيل :)

    انا تأثرت بتجارب غيري، قاعدة اشوفهم اشلون صكوا على نفسهم اشوي، ومع مرور الوقت صاروا مرتاحين أكثر وعندهم خير من عرق جبينهم.. وأحلى شي لما تكون غني من اكتافك

  6. إمـرأة لا تُنسـى  

    صحيح كلامج يا مركبنا
    نصحني عمي // أبو زوجي // اني اخصص عشرة دنانير لكل يوم، وأصرف على اللي احتاجه في هاليوم والباقي من العشرة احطها بصندوق وما أجيسها

    فكرته حلوة بس تناسب الشباب
    قلت له احنا البنات ما تكفينا عشرة في اليوم :))) احيانا ما نصرف شي وبعض الاحيان نصرف بدل الـ 10 أكثر من 100 دينار

Post a Comment