Kwt City

مدينة الكويت

فلوس التقاعد...  

6 comments


قالت: تو الناس على التقاعد، ليش مستعيلة
قلت: حلاته الوحدة تشتري راحة البال
قالت: ان تقاعدتي رح تمليّن وتلوع جبدج من القعدة في البيت
قلت: من قال؟ بيكون عندي جدول! الصبح اتريق مع الوالدة وأتسوق معاها، والظهر أروح لنادي صحي ومن العصر الى الليل اكون مع عيالي أدرسهم وأونسهم
قالت: عيل ما لج في البزنس شي
قلت: ليش أعوّر راسي.. اشتري لي بيت أو عمارة وأجرها ويكون لي مدخول شهري ثابت ومضمون
قالت: من وين يا حظي
قلت: شنو من وين.. احنا ليش نشتغل كل يوم.. ليش ننكرف أكثر من 20 سنة.. عشان نيّمع لنا جم فلس حق هالزمن
قالت: وفلوس التقاعد؟؟؟
قلت: حرامية
قالت: خافي ربّج
قلت: من صجج؟؟ كل من يدري انهم يعطونج أقل ما أتخذ منج
قالت: اييي بس بيعي من معاشج يعطونج جم ألف مثل القرض
قلت: بس ياخذون منج زيادة على المبلغ، يحسبون عليج الفوايد
قالت: بعد؟؟؟؟
قلت: عيل اش حسبالج.. خذ من جيسة وعايدة واشفط منه زود فلوس

قعدنا نفكر.. ونحط خطة للأجيال القادمة.. لنا ولعيالنا
قلت لها.. انا من هالشهر أقدر أخش 300 دينار من معاشي
وإذا زاد بعد خمس سنين.. اخليه 350 أو 400 دينار
خدمتي شكلها بتكون 20 أو 25 سنة.. قولي عشرين سنة على الأقل

300 * 12 = 3600 .. في خمس سنين = 18000 الدرجة الوظيفية الثالثة
350 * 12 = 4200 .. في خمس سنين = 21000 الدرجة الوظيفية الثانية
400 * 12 = 4800 .. في خمس سنين = 24000 الدرجة الوظيفية الأولى

خطة توفير الـ 15 سنة .. حصيلتها 63000 دينار
+ إضافة أي مبلغ يدش من البزنس الحالي
+ إضافة أي مبلغ زايد عن الحاجة
+ إضافة أي مبلغ زيادة عالمعاش
وأظن ان الواحد تكفيه700 دينار يعيش فيها كل شهر
:)

الفكرة منطقية.. فيها شدة حزام.. والتخلي عن بعض الكماليات


هل جربتوا تسوون خطة توفير شخصية؟

بعد غيبة..  

4 comments



ماأجمل أن تبتسم حينما
ينتظر الجميع بُكائك



// انا // في فترة تتلاحق فيها العراقيل وتتحدى قدرتي على الاحتمال




جان إبليس دش الجنة  

10 comments


كتب زميلنا المدوّن // مركبنا // تعليقه في موضوع (مالنا طاري) وأثار بي الشجون، والكآبة.. والإحباط حين ذكر مثل كويتي قديم يقول "لو الخالة حبت الجنة جان إبليس دش الجنة" فعلاً لم تقال عبطاً

كنت أتوقع ان هالمثل "دقة قديمة" لأن الزمن تغيّر وتطوّر وتوسعت مدارك الناس و تثقفت، إلا اني غلطانة.. وأحلامي كانت وردية قبل الزواج، وبعده تقولبت الألوان ودشّت ببعضها وتخربطت الحسبة

ربي سبحانه وتعالى عطاني على قد نيتي ورزقني بزوج صالح فيه كل اللي تمنيته.. بإستثناء عادة التدخين ولأنه يحترم رأيي في هالموضوع ليما الحين ما شفته يدخن جدامي من تزوجنا كله بره.. يعني عريس لؤطة على قولة المصاروة
// لا تحسدوني عليه لأنه عصبي جدا ويبي له سياسة وتكتيكات ومساير.. أكرر لا تحسدوني
:)

المهم، أمه.. كنت اسوي لها يا دهينة لا تنكتين، أمدحها.. أدللها بالهدايا..
جدام الناس أوصف فيها أحلى الوصوف وأخليها ملاك تمشي على الأرض
أتشرق فيها.. وأساعدها في الضيافة رغم ان حماتي تحط ريل على ريل وماتسوي شي ينفع

العشرة خلتني أكتشف ان خالتي تموت على المجاملات.. عادي تمدح فلانة ومن وراها فعلتها وتركتها، خلتني ما اتطمن لها، استمريت على عهدي.. قامت تضايقني بتعليقاتها وتصرفاتها وتحطني في مواقف محرجة مع أهلهم. سكت وقلت يالله أطوفها.. باجر بتحس في قدري لما تجرب جنة ثانية تاكلها بلسانها

زادت الجيلة اشوي.. وماقصرت معاي في المواقف
قامت تنرفزني.. بس جدامها اخذ الموضوع عادي وكأنه النقزات مو لي
والله لو اقول لكم المواقف بتقولون هذي صاحية؟؟

فسرت تصرفاتها،، غيرة.. مرت ولدها البكر فلازم تعطيني كورس وتختبر وتجرّب
كنت اتجاهل كلامها.. لكني غيرت طريقتي وقمت أرد عليها بلطف ودبلوماسية بحيث اني ما اجرحها بكلامي، بس يعني ابين لها اني فاهمتها والشي اللي في بالها مو صحيح

جدام زوجي تمدحني، وهو يقول يا كثرما تمدحج
طبعا ما اصدقهم اهما الاثنين.. لأني اسمع كلام يعجبني بس اشوف تصرفاتها اتعجب

أنا اقدر افتعل مواقف تطلع لها نجوم الليل حزة الظهر
لأني اعرف من هي خالتي واشلون اقدر ارفع ضغطها وأوقف قلبها
لكني أرفض اني أتعامل معاها بهالطريقة لعدة أسباب.. أولها ابي حياتي مستقرة وماأحب المشاكل وما له داعي أخلق مشكلة بيني وبين زوجي.. لأن مهما كانت هي أمــه لو شنو سوت وقالت

زوارتنا أمس، كنت قاعدين في الحديقة بعد الغدا، جان إييبون طبق فيه قطع من الكيك. في أغلب الأحوال أكتفي بالقهوة دون الحلو، لكن عمي قال لي ابنيتي ليش ما تحلّين؟ فـ عشانه ييت بقص لي قطعة عاجبتني لأنها عودة علي، فقلت نص لي ونص حق زوجي، اشوي وإلا خالتي تقول عطيني انا احط لج.. يالله ارزقنا راضية علي.. وهي تسولف يت ذبانة كبيرة على القطعة اللي أبيها.. وخالتي شافتها.. تخيلوا.. كشّتها.. جان اقول لها خالتي ابي بس نصها ما عليج امر.. تخيلوا قصت لي النص.. وعطتني القطعة اللي كانت الذبانة قاعدة فيها
!!

قاصدتها

رح اكمل لكم قصتي وياها
لأني فعلا احتاج افضفض عن هالضيقة
خصوصا اني ماقدر أشكي لأحد
مابي زوجي يزعل
مابي أمي تعرف معاناتي ويضيق خلقها عشاني خصوصا اني وحيدتها
مابي اتكلم لأي انسان اعرفه عشان ما يقولون فلانة تحجت عن خالتها
وفعلتها وتركتها

لأنها أم زوجي.. ويدة ولدي
بالتالي ما عندي إلا انتوا

خشّوها عندكم  

4 comments


أثناء تجولي الانترنتي لقيت مدونة
My Kitchen
للأخت بنت الديرة

تكتب فيها وصفات لأشهى الأكلات، الصور قتـّالة!!ـ

تمنيت لو أقدر ادش المطبخ كل يوم ومعاي اللاب توب

أقترح عليكم ان تخشون عنوان المدونة في البوك ماركس (المفضلة) حق وقت اللزوم.. أما انا بحافظ على سريتها من زوجي العزيز، عشان نضبط حالنا في الرجيم اللي قاعدين نسويه ونعيش على الخفايف وهيلثي

http://aklati.blogspot.com/

:)

مالنا طاري...  

6 comments


صدق زميلنا الاعلامي // أحمد حيدر // بأن الكلام المعسول أفضل الحلول لطالما كانت النساء من الوفرة والرجال من العبدلي فهي الوسيلة الوحيدة لإستقطاب الجنس الآخر في شتى المواضيع سواءً كانت اجتماعية واقتصادية حتى السياسية.ـ

كثر ما دندن الكثير من المرشحين على أوتار حقوق المرأة الكويتية إلا إننا لم نشهد أي قانون يسعد الجنس الناعم حتى الآن. ففي خضم المعارك السياسية نجد ان "مالنا طاري" خير شر، نسونا، تناسونا، كالعادة يدورونا حزة الانتخابات فقط للتصويت.ـ

ملينا منكم بالرياييل.. ـ
لو بنات وحريم الكويت كلهم بتكاتفون ويكونون صوت واحد لترشيح المرأة جان أفضل
شكلي بتعاون مع المدونات النسائية ان نكون جهة تنسيقية واعلامية لمناصرة الكويتية المرشحة

لأن الدستور ينص على المساواة.. وماكو فرق بينا وبينهم
يعني.. لازم يعطونا علاوة اجتماعية لما نتزوج.. حالنا حال الريّال لأن المرأة قامت تشارك الريال بالمصروفات الخاصة..، وبعد تيمّع معاه حق بيت المستقبل، حتى علاوة الطفل.. لازم يعطونا خو احنا اللي نتعب وإنييب ونربي ونشتري لليهال أكثر من المبلغ اللي يخصصه الزوج

اليوم 8 مارس.. يوم المرأة
ومالنا طاري في الجرايد
يمكن حاطينا بدواعيس الصفحات؟


ألف دينار يومياً  

6 comments


خبر طازج ماطلع في الجرايد ليما الحين، ان بنك الخليج بدا يوقف على ريوله مرة ثانية بكل قوة وذلك بعد استعانة رئيس مجلس الإدارة قتيبة الغانم بفريق إدارة عالمي.. اللي بيسوونه رح يخلي الناس اللي اطلعت منه ترد فلوسها مرة ثانية

تقول مصادري الموثوق فيها، انهم رح يخلوّن سحب الدانة يومي ، اسبوعي ، شهري و سنوي
السحب اليومي بيكون 1000 دينار.. فما بالكم بالشهري والسنوي!؟؟؟ بشرط.. ان يكون في حساب الدانة 400 دينار وما فوق، يعني مو مثل اول قط خمسينتك وانساها.. فعلاً بتكون الفكرة انجح من الحسابات البنكية في البنوك الأخرى

يمعوا له

Newer Posts Older Posts