كنت ومازلت إحدى عملاء شركة الوطنية للإتصالات ولا أنوي الحياد عنها، لكن بدأت أشك في قدرة الشركة على استقطاب المزيد من العملاء و "تدليل" العملاء القدامى
الحادثة، بعد مرور أكثر من عامين من استخدام الآير كارد لخدمة الانترنت إنكسرت القطعة بالخطأ ولا يمكن إصلاحها بالتالي "مكانها الزبالة - و انتوا بكرامة" رغم تكلفتها العالية التي دفعتها في ذلك الوقت
اتصلت بخدمة العملاء 121 اسألهم عن البديل، فأجابتني الموظفة بأن توجد قطعة بسعر 69 دينار مع خط، فقلت لها اني عميلة قديمة وعندي خط داتا لاين فـ ماله داعي اشتري خط جديد! انصدمت لما قالت "إذا جذي معناته القطعة 69 بالإضافة إلى 10% من المبلغ" أي غبـــــــــــــاء تسويــــــــــــــقـي؟؟؟! قلت لها "اش ماله عشرة بالإمية بعد؟؟ فأجابت هذا شرط شراء القطعة بدون خط! قلت لها من صجج وإلا اتغشمرين؟ المهم سديت الخط وانا مو مصدقة
اتصلت بشركة زين سألتهم عن سعر قطعتهم وقالوا لي إنها 35 دينار بدون خط، سألتها هل تشتغل ان ركبت خط الوطنية (سؤال داش عرض) جان تقول لي الموظفة "لا ما تشتغل".. اللي اعرفه ان هالقطع نفس المودم عبارة عن جهاز لو أركب خط ماليزي وإلا ياباني عادي يشغله!.. سألت رفيجتي اللي منصبها عود في نفس الشركة نفس السؤال جان تقول لي إنها ما جربت الطريقة بـــــــــــــــس
It would be work ..
اتصلت مرة ثانية بشركة الوطنية للاتصالات كنت ناوية اتفلسف تسويقيا وأكلم المسؤول المباشر لخدمة العملاء، طلع لي الموظف يقول لي غير هالحجي! قلت موظفتكم قالت لي!! جان يقول مادري عنها بس الأكيد ان عادي تشترينها بنفس السعر ماكو زيادة 10% وعندنا قطعة الـ يو اس بي للانترنت بقيمة 25 دينار.. طبعا سألتها عن اللي بو 69 دينار قال لي هذي آير كارد تتركب بس على اللاب توب، قلت له إني ادري ومالتي منكسرة بس شالفرق بين أم 25 و 69.. جان يقول لي اللي بـ 69 هذي تعطي سرعة زيادة على اشتراكج... نعم؟؟؟؟ اصلا انا من عرفتكم قاعدة ادفع 28 دينار على سرعة وهمية مو قاعدة احصل إلا 100 إلى 200 كيلوبايت حتى الـ 500 ما وصلت!! جان يقول لي مايصير قدمي طلب يجيكون لج الشركة مكان بيتك!.. قلت له اكثر من مرة سويتها وكل مرة يقولون الحين أوكى وضبطناه لج لين ييأست وعرفت ان السرعة وهمية... إلخ
شلت شلالتي ورحت فرعهم في مجمع بيروت (عن الزحمة) رايحة و في بالي اشتري القطعة 25 دينار بدون خط (على كلام حضرة الكول سنتر) جان يقول لي الموظف ماكو كل القطع اللي عندنا بداخلها خطوط! قلت له ان موظفكم قال اقدر احصل بدونه، المهم جان يتصل بصاحبه في الفرع الثاني ويقول له (بو فلان اشلونك.. عندك قطعة االانترنت؟ ابيها ستووووك) مادري انا داشة سوق اليمعة بالغلط؟.. المهم سكت.. إلين تيقنت ان كلامهم كله فاضي.. آخر شي قال لي اختى تقدرين تشترين قطعة من الكترونيات الغانم وإلا اليوسفي بس قولي لهم ان لازم تمشي مع الوطنية.. وكأن الوطنية لهم نظام نازل من السما وماحد مسويه ! قلت له يصير خير
اليوم الصبح، دشيت الانترنت من الدوام، وأدخل على موقعهم وإلا اشوف حجي ثاني واسعار ثانية خيالية
بصراحة، قلت ما لي إلا شباب وبنات الديرة.. بسألهم وأكيد بيفيدوني عن أحسن قطعة ألقاها بالسوق
اشرايكم؟
January 19, 2009 at 1:42 PM
قوه
اول شي شيلي الوورد فيريفيكيشن مال التعليقات :)
ثاني شي
القطعه هذي اللي اهي الاير كارد يبيعونها كل محلات الكمبيوتر بكل مكان
وبعدين رفيجي شاري مالت زين ويشغل عليها الاثنين خط زين والوطنيه ولاتسئليني شلون بس جدامي مسويها
:)
January 19, 2009 at 3:58 PM
أنا جربت مال الوطنية اللي كان يشتغل على البلوتوث كان مرض
والحين الإيقو مال زين 7.2
وعلى قولتهم سريع بس يعلق بشكل مو طبيعي
قلت حق امي تقطعه تقولي نطري
اشمالله مادري
انا سمعت يقولون في عرض من فيفا
بس هالشهر
نفس الايقو بس ما اعرف اسمع بالنسبة لهم
والاشتراك لمدة سنة 20 كل شهر
وسرعتة 7.2
والجهاز بلاش
:)
الله يعينج وسؤالج عن شكل المدونة
رديت عليج
واي سؤال او مساعدة حاضر من عيوني
:)
January 19, 2009 at 11:53 PM
كان ودي افيدج
:(
January 20, 2009 at 8:42 AM
اهلا بـ العرزالة
إن شاء الله بشيله اليوم، والله ما كنت أدري انه موجود :)
January 20, 2009 at 8:44 AM
حياتي هدف مو عبث
يا عمري انتي مشكورة ما قصرتي
معقولة فيفا سوتها؟؟ خبري لما كلمتهم قالوا لي ان خدمة الانترنت بس حق جهاز الموبايل
January 20, 2009 at 8:44 AM
vancouver
يكفيني انج موجودة
:)
January 23, 2009 at 11:33 PM
a device called "Hawaii" that u can get from a store called "Camio" in Qairawan in Bin Khaldoon Street
u can use it with any provider and mostly any country as well
the reason is that coz its an open device.. means its not locked by any provider who wants to force u to use their device with them ONLY!
anyways, i hope this helps..I i hope its not too late
g'luck
January 25, 2009 at 11:46 AM
Hi Black Coin,
Thank you brother. Yes, I bought eGo from AlGhanim, & they are making special discount for all devices.
:)
October 9, 2009 at 2:07 AM
الموظفة ماغلطت
والموظف مال الكول سنتر هم ما غلط
وموظف الفرع هم ماغلط
وانتي بعد هم موغلط
انا اعرف واحد بالوطنية يقول
الغلط من الشركة الدايخة اللي تنزل تعميم يقول اوكي نبيع القطعه بدون خط
وبعدها بأسبوع ينزل تعميم يقول لا مانبيعه بدون خط
وبعدها بفترة يقولون لازم 10%
طبعا التعميم القديم يبقى موجودماينشال من اللستة فشي طبيعي ان الموظفين تتضارب معلوماتهم وجدامهم مليون تعميم كل واحد عكس اللي قبله
واحيانا تصير تعديلات على التعاميم بدون لا يتم تنبيه الموظفين
لأن الشركة فيوزاتها متضاربة:)
ومرة يمشون على هذا ومرة على ذاك