ليش الناس يخجلون من التصريح بإصابة انفلوانزا الخنازير؟ يمكن لأن التسمية بايخة.. وبرستيج الكويتي ما يسمح ان يقول ترى الوباء حاشني يا عالم، ما ألوم هالشخص.. لأن ردة فعل المجتمع مبالغ فيها جدا تصل إلى درجة الشماتة "بيـــه ياك الدور" لذلك نشوف الشخص المريض غالبا يمارس حياته الاجتماعية بكل أريحية .. والبعض منهم ينعزل عن العالم إلين يتشافى بإذن الله تعالى
تجربتي مع الوباء أدخلتي في اسئلة كثيرة كشفت لي ان الحكومة صج صج تحتاج إلى فريق إدارة أزمات / مخاطر لوضع خطة شاملة ابتداء من الاصابة إلى امور اخرى عديدة مرتبطة فيه
الانفلوانزا اصابت ولدي "راشد" الذي يبلغ من العمر سنتين ونصف، وخدامتي التي تقوم بالإشراف عليه في حال توجهي للدوام صباحاً، وللحين مادري من وين ياهم الفايرس لأني حرصت ان تكون طلعاتهم من البيت إلى بيت أهلي أو اهل زوجي فقط. إصابة خدامتي كانت شديدة، فـ عزلتها تماما عن اركان الشقة الأخرى وقمت بالواجب من ناحية الاجراءات الطبية واخذ التيمي فلو (دوا انفلوانزا الخنازير) ، أما ولدي الصغير الذي تقل اصابته واعراض المرض عن درجة اصابة الخدامة فـ تلاحقته بعمل الفحص المختبري للكشف عن حقيقة الفايرس ان كان مصاب او لا، فكانت النتيجة ايجابية ويحمل الفايرس.. بالتالي شوفوا اللي صار لي
توجهت إلى مستشفى مبارك ومعاي ورقة النتيجة وتوقيع البروفسور ان الولد مصاب، فعطوني الدوا.. والصدمة الكبيرة هي الدوا عبارة عن كبسولات!! اشلون ياهل عمره سنتين ياخذ كبسولات! فقال الدكتور ان الشراب إمخلص "مافيش" واللي تسوينه إذابة المحتويات الكبسولة في السوائل أو العسل ... والله يا ناس انا اللي اشكبري لما ذقت الطعم لاااااااااااعت جبدي وبغيت استفرغ وظل الطعم في بلعومي فترة!! اشلون اغصب الياهل الصغير اللي ما يفهم ولايستوعب اللي صاير
توكلت على الله، وبدا شغل المساحل والتجارب المطبخية لتحلية السوائل حتى اتمكن للوصول إلى طعم مناسب يضيع طعم الدوا.. الحالة اشبه بـ حرب نفسية مع الطفل، احس ان اشوي ويكرهني!! بس ما عليه تحملت وكنت معاه 24 ساعة
اللي يضحك في الموضوع، ان الدكتور قايل لي "اعزليه في غرفة!" قلت له دكتور انت شايف ان عمره صغير اشلون اعزله؟؟؟؟؟؟ ابدا كلامه مو منطقي.. قلت له اللي يصير فيه خل يصير فيني بس المهم اني اراعي حالته النفسية وكفاية عليه سخونته الـ 39 وسناسينه وكحته، هالدور تبي اصك عليه الغرفة وبروحه ؟!!؟؟؟
قلت له انزين، انا يادوب عندي ايامي قليلة في رصيد اجازاتي الدورية، وايضا مرضياتي اللي طافت اسبوعين في السنة، احتاج مرضية مرافق مريض يا دكتور، قال لي مش عاوزة تاخذي طبية ليكي؟.. قلت له "لا! انا مافيني شي" قام وكتب لي اجازة مرافق مريض 5 أيام وكتب التاريخ
بعد اسبوع من مرض ولدي الصغير، اخذت اجازة اسبوع عشان فترة النقاهة له، وقلت ان كان بيصير فيني شي رح يبين في هالاسبوع، الحمدلله عدى على خير وكاني في صحتي.. المهم داومت، وأول شي سويته سألتهم عن وضع اجازة مرافق المريض، قالوا لي رح تنخصم من رصيدج،، قلت ليش ترى هي مرافق مريض؟؟ قالوا لي لأن الورقة مافيها دخول مستشفى!!!!!!ـ
مافيها دخول مستشفى؟؟؟؟ ومن متى مستشفياتنا يستقبلون المصابين بالفايرس عندهم؟؟؟ إلا إذا كان الياهل فيه ربوا وحالته خطرة ممكن يموت فيها! إلا ان باقي المصابين غالبا يطلبون منهم العزل في غرفة بالبيت، والياهل اللي عندي عمره صغير وماكو احد يقوم فيه غيري! وحتى الخدامة طايحة بالفايرس! يعني انا شسوي بحالي
وصلت الموضوع إلى اكبر راس في الدوام، جان يقول لي في كل برود، ما نقدر نسوي شي لأن ديوان الخدمة المدينة ما قال شي في هالموضوع، وما نقدر نسوي لج شي! .. يا سلام عليكم .. الفايرس وباء عالمي وحبايبنا يعاملونا كأن واحد فيه كحة ونشلة
يعني يا ديوان الخدمة المدنية.. لازم احنا إنتأزم ونعاني وما تراعون الوضع الوظيفي للموظفة وهي راعية البيت اللي تقوم بأسرتها حال مرضهم؟؟ انا عندي ياهل واحد.. مابالكم في حال الموظفات اللي يطيح 3 وإلا 4 من عيالهم شتسوي بعمرها
لي متى مجلس الأمة امقوم الدنيا ومو مقعدها على مشاكل سخيفة دافعها مصالحهم الشخصية
ومو قاعدين يلتفتون للتقصير اللي صاير في وزارة الصحة والتخبط في وزارة التربية بمشكلة الوباء
والحين ديوان الخدمة المدنية... اكملت
اخواني المدونين والمدونات.. أنا وغيري من الموظفات في حاجة إلى وقفتكم معانا لإنصاف حقنا من حكومتنا الرشيدة
ولأني أؤمن بقوة التدوين الانترنتي أرجو أن يتم تداول الموضوع ومطالبة مجلس "الأمة" بتشريع قانون يلزم ديوان الخدمة المدنية ووزارة الصحة بالتعامل مع موضوع الوباء بشكل جدي ومحترف.. ملينا من قوانين القص واللزق
نحتاج إلى حلول نموذجية.. شاملة.. منطقية لمنع انتشاء المرض ومراعاة ظروف الموظفين في جميع مؤسسات الدولة
November 17, 2009 at 12:29 PM
أول شي الحمد لله على السلامة
ما تشوفون شر
ثاني شي
بس لا تزعلين
لا تقولين لاحد ان فيج h1n1
لوووووول
رفيجة اختي ياها المرض وطابت
ولي الحين الجروب كله معتزلها
مايطلعون معاها ولا يعزمونها
تقول لهم انتو يمكن تاخذون المرض من الناس في الجمعية او السوق او اي مكان
يعني ما كوالا انا اعديكم!!
بس الناس مادري شلون تفكر
سلامتكم واجر وعافية يالطيبة
:)
November 17, 2009 at 1:42 PM
غدا الشر
والحمدلله على السلامة
November 17, 2009 at 2:51 PM
سلامات و ما تشوفون شر اخيتي
و فعلا .. البلد لا خطة طوارئ ولا عماة عين
سبحانه اللي مسير امور هالديرة على البركة
November 17, 2009 at 5:40 PM
Ma tshofeen shar dear
:(
November 17, 2009 at 6:07 PM
قوة التدوين الانترنتي وصلت الى جريدة الوطن
http://www.alwatan.com.kw/Default.aspx?tabid=227&article_id=553728
:)
November 17, 2009 at 8:37 PM
السلام..
سلامته مايشوف شر يارب..
مايرعون خبونا بهالمرض بدون لايحطون اجراءات احترازيه له بس يبون يطعمونا @@
وعموما ان شاءالله هالمشكله وتنحل..
واجر وعافيه يارب..
November 18, 2009 at 10:22 AM
اجر وعافية خيه
وغدا الشر
November 18, 2009 at 1:18 PM
** سلامات ماتشوفون شر انشالله والله يحفظلج اوليدج انشالله و يبعد عنكم الشر
وشتقولين يخويتي هذا سيفوه و هذي خلاجينه
November 19, 2009 at 3:42 PM
سلامات لراشد و الخدامة و لج بعد
اقترح عليج التالي
رفعي سماعة التيلفون
لا تنطرين احد من المدونين ينفعج
طلبي تتكلمين مع وكيل الديوان
او روحي بشكل شخصي
سوي موعد
و اطلبي انهم يسوون شي بخصوص هالموضوع
ادري بتستصعبينها
بس محد قال ان التغيير سهل
حاولي
الله يوفقج
November 21, 2009 at 5:17 AM
the best thing is that yr post got published in Alwatan today!! inshalah it will help people understand the nature of the swine flu better
November 24, 2009 at 9:11 AM
العزيزة مــي
فعلا الناس تعزلك تلقائيا لما تسمع ان المرض صار فيج او حتى في عيالج، ولو تشافيتي الناس تطالعك بنظرة مادري اشلون! بصراحة انا كنت اقولهم اشكرة ان ولدي صار فيه مع خدامتي إلا انا.. تصدقين يطالعوني وكأني اعجوبة اشلون ما حاشج؟؟ معقولة؟؟ يمكن صار فيج وانتي ما تبين تقولين! مع ان والله مناعتي مو ذاك الزود وفوق جذي كنت مخلصة من الانفلوانزا العادية قبلها بإسبوعين
مي.. فعلا ماله داعي احد يقول للناس
يعتزل لحاله احسن من الشماته
بس صج صج اكون ناس فيهم الخير
ما ينسونك بالدعاء
November 24, 2009 at 9:12 AM
اخوي عثماني الله يسلمك من كل شر ان شاء الله
November 24, 2009 at 9:13 AM
فريج سعود
الشر ما اييك يا خوي
November 24, 2009 at 9:42 AM
Manal , el shar ma eyeech .. take it easy :)
November 24, 2009 at 9:43 AM
anlme.. Oh! its awesome!
eb hal ser3a?
thanks alwatan!
November 24, 2009 at 9:44 AM
RoRo... DONT... YES, DONT!
Don't take it
November 24, 2009 at 9:44 AM
Basma.., Thank u 3azeezty
November 24, 2009 at 9:45 AM
Mimaa.. 9ij hathi khalajeenah :/
November 24, 2009 at 10:34 AM
6iz blreyayeel ,
seb7an allah! :D
allah ya7fe'6 eljamee3 mn kel makroh
December 10, 2009 at 1:50 AM
سلامتك
وماتشوفين شر
بس الله يخليج اذا زاد عندج كم حبة
خشيهم لنا وقت الحاجة
الله يرحم والدينك يارب