Kwt City

مدينة الكويت

WhatsApp زيــن تحجــب  

, , 10 comments







مازال عدد
الآيفونيين (مستخدمي الآيفون) يزداد في الكويت
رغم انتشار البلاكبيري الجامد
وبدأ عدد البلاكبيريين في تناقص بعد انتشار الآيفون
الذي تفوق عليه فنياً وتقنياً رغم تكلفته العالية

وقد أدرك البلاكبيريين مؤخراً ان الآيفون ممتع جرافيكسياً
ومريح للعين نظراً لـ وساعة شاشته

برنامج WhatsApp
هو من أقوى برامج الشات في الآيفون ولا يتطلب منك رمز ولا بحث عن اصدقائك
من خلال رقم هاتفك سيبحث عن اصدقائك الآيفونيين - بنفسه - وإضافتهم في قائمة مفضلاتك
بإمكانك ارسال رسائل وصور.. ويوجد فيه خاصية البـش نوتيفاي .. ببلاش

وهالشي ضايق ربعنا في شركة زين.. اللي بدت تشكي انخفاض رهيب في المسجات والـ ام ام اس
قامت وســـوّت بـــلوك  للإصدار الجديد من البرنامج
- يعني اللي عنده الاصدار القديم لا يجدده -
لأن في الابديت شركة البرنامج تذكر ان الشركات الفلانية امنعت الخدمة لمستخدمينها

رسالتنا إلى زين
إلى متى هذا التكلّف ؟
متى تحبون وتتقبلون شي اسمه ببلاش؟
متى تتطورون وتكسبون عملائكم؟
ما تكفيكم كسرة الـ ماي فاي؟
;Pp

زين...... عالم جميل، أهو كذلك؟
اتحفوني بتعليقاتكم



و .. زيـــــن عالــــــــــم جميـــــــــــــل


تجربتي مع انفلوانزا الخنازير  

, 20 comments


ليش الناس يخجلون من التصريح بإصابة انفلوانزا الخنازير؟ يمكن لأن التسمية بايخة.. وبرستيج الكويتي ما يسمح ان يقول ترى الوباء حاشني يا عالم، ما ألوم هالشخص.. لأن ردة فعل المجتمع مبالغ فيها جدا تصل إلى درجة الشماتة "بيـــه ياك الدور" لذلك نشوف الشخص المريض غالبا يمارس حياته الاجتماعية بكل أريحية .. والبعض منهم ينعزل عن العالم إلين يتشافى بإذن الله تعالى
تجربتي مع الوباء أدخلتي في اسئلة كثيرة كشفت لي ان الحكومة صج صج تحتاج إلى فريق إدارة أزمات / مخاطر لوضع خطة شاملة ابتداء من الاصابة إلى امور اخرى عديدة مرتبطة فيه
الانفلوانزا اصابت ولدي "راشد" الذي يبلغ من العمر سنتين ونصف، وخدامتي التي تقوم بالإشراف عليه في حال توجهي للدوام صباحاً، وللحين مادري من وين ياهم الفايرس لأني حرصت ان تكون طلعاتهم من البيت إلى بيت أهلي أو اهل زوجي فقط. إصابة خدامتي كانت شديدة، فـ عزلتها تماما عن اركان الشقة الأخرى وقمت بالواجب من ناحية الاجراءات الطبية واخذ التيمي فلو (دوا انفلوانزا الخنازير) ، أما ولدي الصغير الذي تقل اصابته واعراض المرض عن درجة اصابة الخدامة فـ تلاحقته بعمل الفحص المختبري للكشف عن حقيقة الفايرس ان كان مصاب او لا، فكانت النتيجة ايجابية ويحمل الفايرس.. بالتالي شوفوا اللي صار لي
توجهت إلى مستشفى مبارك ومعاي ورقة النتيجة وتوقيع البروفسور ان الولد مصاب، فعطوني الدوا.. والصدمة الكبيرة هي الدوا عبارة عن كبسولات!! اشلون ياهل عمره سنتين ياخذ كبسولات! فقال الدكتور ان الشراب إمخلص "مافيش" واللي تسوينه إذابة المحتويات الكبسولة في السوائل أو العسل ... والله يا ناس انا اللي اشكبري لما ذقت الطعم لاااااااااااعت جبدي وبغيت استفرغ وظل الطعم في بلعومي فترة!! اشلون اغصب الياهل الصغير اللي ما يفهم ولايستوعب اللي صاير
توكلت على الله، وبدا شغل المساحل والتجارب المطبخية لتحلية السوائل حتى اتمكن للوصول إلى طعم مناسب يضيع طعم الدوا.. الحالة اشبه بـ حرب نفسية مع الطفل، احس ان اشوي ويكرهني!! بس ما عليه تحملت وكنت معاه 24 ساعة
اللي يضحك في الموضوع، ان الدكتور قايل لي "اعزليه في غرفة!" قلت له دكتور انت شايف ان عمره صغير اشلون اعزله؟؟؟؟؟؟ ابدا كلامه مو منطقي.. قلت له اللي يصير فيه خل يصير فيني بس المهم اني اراعي حالته النفسية وكفاية عليه سخونته الـ 39 وسناسينه وكحته، هالدور تبي اصك عليه الغرفة وبروحه ؟!!؟؟؟
قلت له انزين، انا يادوب عندي ايامي قليلة في رصيد اجازاتي الدورية، وايضا مرضياتي اللي طافت اسبوعين في السنة، احتاج مرضية مرافق مريض يا دكتور، قال لي مش عاوزة تاخذي طبية ليكي؟.. قلت له "لا! انا مافيني شي" قام وكتب لي اجازة مرافق مريض 5 أيام وكتب التاريخ
بعد اسبوع من مرض ولدي الصغير، اخذت اجازة اسبوع عشان فترة النقاهة له، وقلت ان كان بيصير فيني شي رح يبين في هالاسبوع، الحمدلله عدى على خير وكاني في صحتي.. المهم داومت، وأول شي سويته سألتهم عن وضع اجازة مرافق المريض، قالوا لي رح تنخصم من رصيدج،، قلت ليش ترى هي مرافق مريض؟؟ قالوا لي لأن الورقة مافيها دخول مستشفى!!!!!!ـ
مافيها دخول مستشفى؟؟؟؟ ومن متى مستشفياتنا يستقبلون المصابين بالفايرس عندهم؟؟؟ إلا إذا كان الياهل فيه ربوا وحالته خطرة ممكن يموت فيها! إلا ان باقي المصابين غالبا يطلبون منهم العزل في غرفة بالبيت، والياهل اللي عندي عمره صغير وماكو احد يقوم فيه غيري! وحتى الخدامة طايحة بالفايرس! يعني انا شسوي بحالي
وصلت الموضوع إلى اكبر راس في الدوام، جان يقول لي في كل برود، ما نقدر نسوي شي لأن ديوان الخدمة المدينة ما قال شي في هالموضوع، وما نقدر نسوي لج شي! .. يا سلام عليكم .. الفايرس وباء عالمي وحبايبنا يعاملونا كأن واحد فيه كحة ونشلة
يعني يا ديوان الخدمة المدنية.. لازم احنا إنتأزم ونعاني وما تراعون الوضع الوظيفي للموظفة وهي راعية البيت اللي تقوم بأسرتها حال مرضهم؟؟ انا عندي ياهل واحد.. مابالكم في حال الموظفات اللي يطيح 3 وإلا 4 من عيالهم شتسوي بعمرها
لي متى مجلس الأمة امقوم الدنيا ومو مقعدها على مشاكل سخيفة دافعها مصالحهم الشخصية
ومو قاعدين يلتفتون للتقصير اللي صاير في وزارة الصحة والتخبط في وزارة التربية بمشكلة الوباء
والحين ديوان الخدمة المدنية... اكملت
اخواني المدونين والمدونات.. أنا وغيري من الموظفات في حاجة إلى وقفتكم معانا لإنصاف حقنا من حكومتنا الرشيدة
ولأني أؤمن بقوة التدوين الانترنتي أرجو أن يتم تداول الموضوع ومطالبة مجلس "الأمة" بتشريع قانون يلزم ديوان الخدمة المدنية ووزارة الصحة بالتعامل مع موضوع الوباء بشكل جدي ومحترف.. ملينا من قوانين القص واللزق
نحتاج إلى حلول نموذجية.. شاملة.. منطقية لمنع انتشاء المرض ومراعاة ظروف الموظفين في جميع مؤسسات الدولة

لا تعتذر ان ما كنت غلطان  

, , 15 comments

الاعتذار .. يحتاج الى شجاعه
لكن لا تعتذر ان ما كنت غلطان
في ناس في هالزمن يفسرون الامور على كيفهم
ويشوفون انك غلطت في حقهم مع ان الحق معاكم
يقلبون الدنيا عليك .. ويعاملونك بقسوة وجفا
بس ما عليه.. اصبر عليهم واحتسب الاجر من ربك
لأن اكبر غلط.. ان رحت لهم واعتذرت على شي مو غلطان فيه
بالكويتي الفصيح .. رح يدوسونك
الحال هذا يصير بين الخوات والاخوان
الأهل والاصدقاء
الزوج وزوجته.. طبعا هالاثنين الأخيرين فاصل مختلف
كنت دايما اسمع الكبار يقولون لازم الزوجة تعتذر لزوجها
حتى لو هو اللي فهمها غلط وهي مو غلطانه
ذنبها انه زوجها ولازم يرضى عليها بأي طريقة
لأن الملائكة رح تلعنها ان نام وهو زعلان
فتبدا النصايح.. روحي له اعتذري له ، دوسي على كرامتج
عشان تمشي حياتج
:)
وبس انحلت مشاكلهم؟
:)
برأيي المتواضع.. وخبرتي المتواضعة
رغم قوة شخصيتي إلا اني ما امارسها عليه
أكون عادية جدا
وان صار بيننا خلاف وهو اللي فهم غلط
أروح ابين له وجهة نظري وان ابي اصلح الامور
لكــــــــــــن ما اعتذر ان كنت على حق
ما اعتذر ان كان هو اللي غلطان
ولا اطالبه انه يعتذر لأن رجولته ما تسمح بعض الأحيان
فأحاول اني اطوف الموقف بطريقة دبلوماسية
لكن ان ظل الريال مقفل وإلا اعتذري ابي اسمع كلمة اسف
ما يشوف شر.. اوضح له اني ما غلطت بشي
وأخليه براحته .. إلين هو يفكر مرة ومرتين و3 مرات في الموضوع
وعقبها ايي ويسولف كأن ماكو شي
هذي هي تجربتي.. قد تكون مدمرة لووووول
بس بصراحة رياييل أول مو مثل شباب هالوقت

تهنئة  

6 comments

مبارك عليكم شهر رمضان
ويتقبل الله منا ومنكم صالح الاعمال
ان شاء الله

Newer Posts Older Posts