Kwt City

مدينة الكويت


Project Natal
المشروع الرهيب اللي مايكروسوفت اكشفت عنه مؤخراً
هو النسخة الجديدة من
xBox
الحين، تقدر تتحكم في الألعاب الإلكترونية بإستخدام حركة جسدك أمام وحدة استشعار معقدة تحتوي على عدد كبير من الكاميرات والمستشعرات الرقمية بدون لا تمسك أي جهاز
يعني صكوا على لعبة
Wii

الجهاز ماراح ينزل هالسنة
متى وجم سعره.. ماحد يدري
للتفاصيل اضغط هنا

شوفوا اشلون اللعب صاير.. حده يشوّق
http://www.youtube.com/watch?v=I9tmr8VDqN8



وأيضا.. شوفوا هالفيديو
http://www.youtube.com/watch?v=fIqk4yNmSD4&feature=related



اسماء الشخصيات و وظيفتهم وتاريخ زواجهم.. "وهمية" إلا انها قصة حقيقية


فيصل ، الموظف الجديد اللي يه مكان المشرف الاجتماعي السابق، أول ما عرفناه تكانة.. رزين.. حتى سلام ما كان يسلم الصبح، حتى اعتقدت انا ورفيجتي انه يستحي من البنات، و احنا احترمنا هالشي ما كنا نسلم عليه عشان ما نحرجه. رفيجه أحمد في المكتب المجاور، انسان خلوق، اجتماعي، يوقف عند كل باب يسلم ويمكن يسأل ويتكلم عن جم موضوع عام ويمشي.. واحنا بعد كنا إذا مرينا يم مكتبه سلمنا عليه واحنا واقفين.

مرت شهور، سمعنا ان فيصل تقدم حق جارة رفيجه اللي معانا في الدوام، وقال لنا أحمد ان هو اللي دله على بنت جارهم كونها خوش انسانة ويعني "متنقـص له" هالبنت.. أنا ورفيجتي ضحكنا من وراه وعلقنا ليما قلنا بس، بس والله تعليقنا كان بحدود النقصة (كما يحب هو ان يسميها) فـ قلنا ليش ماهو خذاها له رايح متنقصها حق رفيجه، قلة اللي يسوون جذي

المهم، مرت 3 سنين على زواج فيصل، وحتى أحمد تزوج انسانة شحليلها خوش بنت

ذاك اليوم وأنا مع رفيجتي في المكتب نسمع وحدة تضحك من قلب.. ضحكة فصاعة.. إلتفت إلى رفيجتي "صج اللي سمعته" جان تقول لي يمكن هذي موظفة ما تعرف تمسك نفسها لما تضحك! قلت لها نعم؟؟ مو جذي يضحكون جنها قاعدة في كازينو بمصر!!.. المهم ما كنا ندري هذي منو

مرت الأيام واحنا نسمع سوالفها وضحكها وغشمرتها البايخة مع منو... مع فيصل وأحمد
احمد ما كان يندمج معاهم ودايما يخلي المكتب ويروح يشوف شغله.. بقى فيصل

قمنا نشوف هالبنت كل يوم في مكتب فيصل.. تسولف وتضحك (بعد حريم اشتبونا نسوي لازم نعرف من هي) .. أول شي قلنا يمكن هذي زوجة فيصل، بس مستحيل ان فيصل يرضى انها تضحك جذي علناً ومكتب رفيجه لزيقه ويمه، وتخليه يقوم من مكتبه وهي تقعد على كرسيّه وبحضور باقي الربع اللي اشكالهم ما تنبلع، يعني كراكتر شخصيته مو جذي هو رزين. قلنا يمكن طالبة في الجامعة وعندها مشكله.. بس سوالفها غير شكل.. فصاعة وتدلـّع على كيف كيفه

يوم كانت رفيجتي تاخذ اوراقها من السكرتيرة، إلا و هذيك تطن ضحكتها لآخر الممر، جان تسأل السكرتارية من هذي؟؟ فقالت لها انها موظفة يديدة في القسم الفلاني (اللي ماله شغل كلش بشغل فيصل) .. رجعت رفيجتي تقول لي السالفة

يعني معقولة يا شباب اللي يتزوج يرضى يكون في هالوضـع؟
ويصير عسل على قلبه؟
إنزين لو زوجته مرت عليه صدفة، اش تشوووف؟؟؟
إنزين هل فيصل رح يرضى يشوف زوجته قاعدة بمكتب موظف وتضحك وتكركر؟؟
إنزين ليش مايكون عندنا اخلاقيات في العمل وخارج العمل؟؟






لا تعليق .. من قلب

الـ هيلا هوب تقال عند ملاعبة الأطفال ومرجحتهم من أعلى إلى أسفل، ولا أقصد " جوارب " الهيلاهوب المتعارف عليه عندنا. أما الـ
Hip Hop
فــن أمريكي تغنى به الأمريكان السود للتعبير عن المعاناة العنصرية ومشاكلهم العويصة بينهم وبين الأمريكان البيض اللي ما يواطنونهم خير شر ويمنعونهم من حقوق العيش بحياة كريمة ويعزلونهم عن خلق الله ولا يعاملونهم معاملة آدمية.

أغاني الهيب هوب، لو تمعّنت في كلماتها.. ستجدها توصف الحياة والحب بشكل بسيط ممزوج ببعض الوقاحة و الكلمات الجنسية الفاضحة جداً، تكتمل ظواهر الأغنية وفصولها بالرقص وتحريك الفنان يديه عند الغناء بإشارات لها معاني تخص الأمريكان السود، غالبا تكون ملابسهم واسعة، مع قبعات، والحلي والوشم.

الهيب هوب، لم يكن مجرد اغنية إنما أصبحت رسومية على الجدران بإستعمال البخاخات، ..

استنتاجي هو ان هذا النوع هو تفريغ الكبت اللي تعيشه هذي الفئة من الناس

أكيد بتقولون شنو المهم في هالموضوع.. و اش علينا منهم..
أنا اقول لكم الحقيقة من وراء كتابتي لموضوع مثل هذا

شباب الكويت.. عيالنا.. أصبحوا مثل الزنوج السود تماماً..
صار لهم غسيل مخ، والحكومة ساكتة عنهم..
وأهلهم مو حاسين فيهم

أكثر من مرة أشوف شباب بإيدهم مسجلة ومشغلين أغاني الهيب هوب وقاعدين يترقصون عند المجمعات و بجانب الجمعيات وصوب باحات المدارس، وإذا دققنا بنشوفهم لابسين الملابس الوسيعة والسلاسل! اش قصه هالسلاسل اللي اشوفها برقاب الشباب والمراهقين الكويتيين! يا صاروا زنوج أو صاروا بنات!.. يعني كول وكشخة؟

رسومات الهيب هوب قاعدين نشوفها في كل مكان!! بيوت.. مدارس.. مساجد.. مجمعات.. جمعيات.. محولات كهربا.. لافتات الشوارع والاعلان.. مباني أثرية (مثل القصر القديم مادري حق اي شيخ اللي في بيان) تفاجأت لما رفيجتي قالت لي ان حتى هالمكان شخبطوا فيه .. ماخلوا شي ما اكتبوا عليه

اللي يسوي هالشي.. أقول له هل هذي حضارة يا شقول؟؟

والله شي يحر.. الحكومة كل مالها تصبغ وتصبغ.. فلوسها تروح على قواطي الصبغ لكن مو قاعدة تدرس الموضوع وتدوّر له حــل وعلاج

ليش هالشباب قاعدين يسوون جذي؟ بس تقليد؟ ما اتوقع.. يبي لهم تحليل نفسي للوصول إلى اصل الدوافع اللي خلتهم يسوون جذي

مقتبس من هاوي هب هوب

لما انت تكون تايه امشي
حسب النجوم ونجوم الراب
باسم الدام الشيء الذي يدوم


نمونه من حجيهم.. ويسمونها ثقافة
!!
http://www.4shared.com/file/110363849/7f6b035/_01_.html






في الصور العائلية لا أحد خائن
بل الجميع مبتسم، بينما الخيانة
كـ لــص ينام بيننا حين نطفيء الأنوار

من رواية للحزن خمسة أصابع - محمد حسن احمد



أن تكتب يعني أن تفني عمرك في محاولات تائهة لشرح ذاتك للآخرين، والأخرون هم الناس الذي لا يأبهون لك أصلاً، وعندما تغيب يهتمون بها ; لأنهم يستغلوّن محاولاتك تلك لشرح ذواتهم من خلالها

من رواية سقف الكفاية - محمد حسن علوان



البشر مهيئون إذا اقتضى الأمر، لإرتكاب الشر

من رواية الشيطان والآنسة بريم - باولو كويلو



لو عرفتك لامتلكتك، ولو عرفتني لامتلكتني، فلا أكون.. ولا تكون

من رواية في حضرة الغياب - محمود درويش


أخيراً! عدة محاولات فاشلة في تنصيب السيديا والجلبريك وترعص الدقم تلتها النتيجة النهائية المفرحة جداً، فقد استطعت تركيب التعريب بنفسي - تشطرت اشوي - ليلتها سهرت عليه لين شفت الاحرف العربية جدام عيني
.. الحين ناقصني اركب بعض البرامج اللي تطوّر من الآيفون اشوي، على اشوية ألعاب لزوم أونّس فيها رشودي ولدي

اشكر كل من، الزائر المجهول اللي موراضي يدش بأكاونته
والزميل سرحان على اقتراحاته من البرامج الجيدة