Kwt City

مدينة الكويت


اقترحت على زوجي العزيز ان نروح السينما ونشوف لنا فيلم يبعثر ضيقة الخلق اللي صايبتنا هالأيام من الاخبار السياسية والاقتصادية ومغثات الدوام

وافق بشرط انه يكون فيلم كوميدي، دخلت موقع السينما وماشفت غير فيلم مناحي بالقائمة. بصراحة، ترددت احجز قلت يمكن خسارة مايستاهل ومايسوى ومالي خلق نطلع بنص الفيلم.. الوناسة تستحق المبادرة ولو بالشي القليل

كنت أحسب ان الفيلم "عبيط ومسخرة" مثل اللي شفته في دعايات الأفلام الكويتية الجديدة (بإستثناء نفوط) أو ان يكون له صبغة الافلام المصرية اللي احداثها سخيفة وسطحية وما تسوى

بصراحة، الفيلم طلع عكس توقعاتي.. كراكتر الفنان فايز المالكي (مناحي) أثبت قدرته على التميز من الشاشة الصغيرة إلى دور عرض السينما، فعلا الفيلم يضحّك ، راقي في طرح قضايا المجتمع وتناولها بسلاسة إلى درجة انك ما تحس بالملل من الاحداث، وأيضا الفيلم ماهو مجرد فيلم وخلاص، إنما احتوى على أهداف قيّمة تؤثر في نفس المشاهد وتخليه يعيد حساباته في هالدنيا

المهم، إذا منتوا للحين مو شايفين الفيلم، أنصحكم تشوفونه

عشان أغذي روحي بالكوميديا والفكاهة، حجزت فيلم
YES MAN
لـ جيم كاري

وانتوا وين بتروحون هالويك إند؟




.


السلطان قابوس .. ملك سلطنة عمان
وينه فيه؟ عسى ما شر ما ينشاف؟
لا مؤتمرات .. ولا تصريحات
كله نشوف ممثلي عن عمان
في جميع المحافل والاجتماعات الدولية

يقولون مريض.. ويقولون انه توفى بس ساكتين عشان ما تصير بلبلة في السلطنة

يا ترى وين الحقيقة


أخيراً .. اشتريت القطعة بدال الآير كارد المكسور

لأول مرة أحس ان الانترنت اللي عندي سريع جدا
اشتريتها من إلكترونيات الغانم بسعر 39 دينار
هي للانترنت وأيضا تقدر تحط داخلها ميموري الموبايل
عشان يصير مثل فلاش ميموري

برنامج التعريف سهل جداً.. انت تختار بلدك ويطلع لك الشبكات المتوفرة
الكويت موجودة في القائمة


بصراحة،، انا في قمة المتعة.. ويا حبي للمصاريف الزايدة
:)


السلام عليكم

ستايل المدونة صار يشرح النفس
ودي بمساعدة صغيرة

اشلون أشيل دعاية الجوجل
وأضبط التاريخ
علماً بأني سويت التاريخ بالفورمات المطلوبة


هل من طريقة؟


كنت ومازلت إحدى عملاء شركة الوطنية للإتصالات ولا أنوي الحياد عنها، لكن بدأت أشك في قدرة الشركة على استقطاب المزيد من العملاء و "تدليل" العملاء القدامى

الحادثة، بعد مرور أكثر من عامين من استخدام الآير كارد لخدمة الانترنت إنكسرت القطعة بالخطأ ولا يمكن إصلاحها بالتالي "مكانها الزبالة - و انتوا بكرامة" رغم تكلفتها العالية التي دفعتها في ذلك الوقت

اتصلت بخدمة العملاء 121 اسألهم عن البديل، فأجابتني الموظفة بأن توجد قطعة بسعر 69 دينار مع خط، فقلت لها اني عميلة قديمة وعندي خط داتا لاين فـ ماله داعي اشتري خط جديد! انصدمت لما قالت "إذا جذي معناته القطعة 69 بالإضافة إلى 10% من المبلغ" أي غبـــــــــــــاء تسويــــــــــــــقـي؟؟؟! قلت لها "اش ماله عشرة بالإمية بعد؟؟ فأجابت هذا شرط شراء القطعة بدون خط! قلت لها من صجج وإلا اتغشمرين؟ المهم سديت الخط وانا مو مصدقة

اتصلت بشركة زين سألتهم عن سعر قطعتهم وقالوا لي إنها 35 دينار بدون خط، سألتها هل تشتغل ان ركبت خط الوطنية (سؤال داش عرض) جان تقول لي الموظفة "لا ما تشتغل".. اللي اعرفه ان هالقطع نفس المودم عبارة عن جهاز لو أركب خط ماليزي وإلا ياباني عادي يشغله!.. سألت رفيجتي اللي منصبها عود في نفس الشركة نفس السؤال جان تقول لي إنها ما جربت الطريقة بـــــــــــــــس
It would be work ..

اتصلت مرة ثانية بشركة الوطنية للاتصالات كنت ناوية اتفلسف تسويقيا وأكلم المسؤول المباشر لخدمة العملاء، طلع لي الموظف يقول لي غير هالحجي! قلت موظفتكم قالت لي!! جان يقول مادري عنها بس الأكيد ان عادي تشترينها بنفس السعر ماكو زيادة 10% وعندنا قطعة الـ يو اس بي للانترنت بقيمة 25 دينار.. طبعا سألتها عن اللي بو 69 دينار قال لي هذي آير كارد تتركب بس على اللاب توب، قلت له إني ادري ومالتي منكسرة بس شالفرق بين أم 25 و 69.. جان يقول لي اللي بـ 69 هذي تعطي سرعة زيادة على اشتراكج... نعم؟؟؟؟ اصلا انا من عرفتكم قاعدة ادفع 28 دينار على سرعة وهمية مو قاعدة احصل إلا 100 إلى 200 كيلوبايت حتى الـ 500 ما وصلت!! جان يقول لي مايصير قدمي طلب يجيكون لج الشركة مكان بيتك!.. قلت له اكثر من مرة سويتها وكل مرة يقولون الحين أوكى وضبطناه لج لين ييأست وعرفت ان السرعة وهمية... إلخ

شلت شلالتي ورحت فرعهم في مجمع بيروت (عن الزحمة) رايحة و في بالي اشتري القطعة 25 دينار بدون خط (على كلام حضرة الكول سنتر) جان يقول لي الموظف ماكو كل القطع اللي عندنا بداخلها خطوط! قلت له ان موظفكم قال اقدر احصل بدونه، المهم جان يتصل بصاحبه في الفرع الثاني ويقول له (بو فلان اشلونك.. عندك قطعة االانترنت؟ ابيها ستووووك) مادري انا داشة سوق اليمعة بالغلط؟.. المهم سكت.. إلين تيقنت ان كلامهم كله فاضي.. آخر شي قال لي اختى تقدرين تشترين قطعة من الكترونيات الغانم وإلا اليوسفي بس قولي لهم ان لازم تمشي مع الوطنية.. وكأن الوطنية لهم نظام نازل من السما وماحد مسويه ! قلت له يصير خير

اليوم الصبح، دشيت الانترنت من الدوام، وأدخل على موقعهم وإلا اشوف حجي ثاني واسعار ثانية خيالية

بصراحة، قلت ما لي إلا شباب وبنات الديرة.. بسألهم وأكيد بيفيدوني عن أحسن قطعة ألقاها بالسوق

اشرايكم؟



الفرح هو الشيء الوحيد الذي لا يندرج تحت قانون ندرة الموارد الطبيعية